عمتي والإنتر نت.......

اول ماتخرجت والصيفيه مقبله رحت لابوي وقلت له

بابا بابا با با ... فين الهديه اللي انت مواعدني فيها فينها ياباشا <<<< يعني يايبه وين الوعد

ابوي ... ابشر بالخير وانا ابوك امر تدلل <<<< يعني اامور يابني

انا ... بابا هنا هنا هوه بابا انا عايز لاب توب ودي اس ال <<< يعني ابي كمبيوتر محمول واتصال سريع

ابوي .. ابشر غالي والطلب مخيس <<<<< يعني تبطي مافيه امل

ومره من المرات جاء ابوي وقالي انت ياهيه رح شف شريت اللي تبي

يوم رحت لقيته شاري طبق بيض وكرتون سن توب ونص درزن بيالات ودفتر ابو اربعين ومشط وشطرطون

ماادري وش فيه من التناسق بين المقاضي

المهم رحت للوالد قلت وين طلباتي ... قال جبت لك سن توب وش تبي بعد . سمع لاب توي يحسبه سن توب

المهم رحت وشريت بنفسي كل شي وانا في قمة الوناسه اجازه صيفيه ونت سريع 24 ساعه يابختي

مافيه الا منتديات وشاتات ومواقع اللين تفقع عيوني وانام واقوم على الجهاز واكل واشرب على الجهاز

حتى جاء ذاك اليوم واسمع صجه في بيتنا وفي الغرفه اللي تحتي بالضبط

صوت فرحه وزعاق ونشاط من الصبح

يوم نزلت لقيت ابوي جايب عندنا عمتي اللي اكبر من ابوي بعشر سنين تقريبا يعني عمرها في نهاية الخمسينات

فرحت فرحه يعني اجازه ونت وعمتي اللي تسمعني من قصصها اللي ابنقلها للصرقعه هنا ضمنت التثبيت لمواضيعي وضمنت الاشراف وضمنت العضويه الدائمه وضمنت ان القراء يلاحقوني <<< ليش قطوا انتي يلحقونك

جيت الصبح عند عمتي والقاها تتقهوى مع ابوي وحبيت راسها ياسلااااااااااااام ريحة حنااااااااا على كيف كيفك ورادو جنبها وسجاده خوص وريحة معمول

قلت هلا عمتي وش اخبارك يالقديمه

قالت وشذا وانا عمتك وشذا اللي معك شنطة بيالات

قلت هذا لاب توب كمبيوتر محمول

قالت وش هيلاهوب وش محموله قل كنبنوتر وبس

قلت ياعمتي هذا انتر نت يطلع أي شي تبينه في العالم أي شي مره تشوفينه قدامك

قالت ايه اذكره يوم كان طين << وين مخبز هو

قالت صدق تكفى ابي اشوف ابو ناصر الله يرحمه (( هنا طأطأنا رؤسنا حزنااا مع موسيقى هاديه مدري وين جت منه حزنا على ابو ناصر )) عند انطر نطكم ذا شي له ورونيه

قلت والله البلشه تبي تشوف صورة زوجها وش ذا الطلب

المهم واذب الشماغ على قوقل قلت داخل على الله ثم عليك ابي صورة شايب قديم أي شي بس خلها مهيب واضحه

واكتب بقوقل شايب في المشراق وطلع لي صورة رونالدينهو وفريق برشلونه امحق قوقل قلت احلى عمتي متزوجه اسباني <<< رونالدينهو برازيلي وش دخل اسبانيا

المهم انا وقوقل اللين لقينا صورة شايب قديمه قلت عمتي لقيت صوره ابو ناصر في الانتر نت واحط الصوره انتظر دموع حب رومنسيه شي ابد

قالت عمتي مالت عليه اصلا انا مااحبه لاني قلت له ركب لي انطر نط وعيا علي اكرهه اكرهوه وحطت يدها على وجهها وقامت تصيح وقمنا انا وابوي نصفق وسكرنا الستاره

مدري عن عمتي ذي قلبتها مسرحيه هي وزوجها

المهم قمت اوري عمتي الانتر نت العجيب وكل شي فيه حتى وريتها الشات وقلت هذا ياعمتي تقدرين تسولفين مع أي واحد بالعالم وتطلبينه خاص

قالت هذا اللي كنه نهاية فلم امريكي كتابات كثيره وتمر بسرعه

قلت ايه اسمه شات

جاز لها الوضع

وقالت خله عندي ابلعب فيه

قلت تامرين امر ياعمه ياصديقتي الجديده

المهم يوم جاء من بكره وادخل على عمتي والقاها لاهيه بالنت وتدهر وفي الشات بعد ياليته منتديات وكتاب وقراء شاتات ومطيحه الشباب كلهم

قلت بس ابروح للجهاز الثاني بالبيت وادخل عليها

واقعد اناظر هي في أي شات علشان اطلبها خاص وقدرت اعرف الشات واسمها تدون وش اسمها (( بنت قمر لابسه قصير )) يعني تبي تجمع بين بنت قمر راكبه همر وبين شاربه عصير ولابسه قصير على طول دريت انها عمتي وهل يخفى القمر

طلبتها خاص قلت ممكن ماامداني اطلبها الا هي جايه زاحفه وتقول لبيه يعني واضح انها قديمه

الحوار بينا في الخاص

انا .. من وين الحلوه
قالت .. من غرفتي << تنكت بعد
قلت كم عمرك
قالت يعني ابخلص ال18 وداخله على 59
قلت وش اسمك الصدق
قالت مزنه ويدلعوني موضي
قلت هواياتك
قالت يعني ايش هوايات
قلت وش تسوين وقت فراغك
قالت ادهن رجليني واحني شعري وارقد
قلت بس هذي فارسة احلامي <<< خق معها نسى انها عمته
قلت لها ممكن اشوفك
قالت ياليت بس اخوي يرفض لاني ساكنه عند اخوي <<<< حبيبه تعلم بالصدق قلت طيب لك ولد اخو
قالت ايه ياشينه بثر ومزعجني ويمنعني من النت

بدت تغلط علي وماتدري اني اكلمها

قلت احترمي نفسك ولد اخوك احسن منك

قالت مايخسي الا هو انا عمته واكبر من ابوه بعشر سنين ومايقعد عندي يونسني

قلت المهم لايكثر الرجال ماقصر معك عطاك النت

قالت وش دراك

قلت المهم ابي اشوفك

قالت الوعد اسواق صحارى << امش تعرف تواعد

قلت قدام بس حاولي تفضين نفسك ابروح انا وياك مطعم كلاسيكي رومنسي

قالت ماعندي مشكله بس دور مطعم يضبط الحنيني

قلت ابشري بس وش اسمك بلوتوث علشان اعرفك

قالت اسمي سمنس ان 73

قلت ايه عرفت شكل معها تلفون ثابت وتطلع به المهم ياموضي الوعد عند الالعاب

قالت تم بس اذا مالقيتني تلقاني عند دورات المياه <<< فيها السكر كل شوي للحمام

قلت وش لون تنورتك علشان اعرفك
قالت دراعه كوحلي فيها نقط حمر <<< جلال صلاة ذا

قلت طيب وش تبيني اسمي نفسي بلوتوث علشان تعرفيني

قالت خل اسمك الديرمه <<< اللي يحبونها العجز

قلت طيب وش تبين هديه اجيبها معي

قالت ابي مهفه <<< حقت الاولين اللي يهفون بها الهواء

الظاهر الترجمه اصعب من اللقاء معها

المهم يوم نزلت ذاك اليوم من غرفتي

قالت عمتي اسمع وانا عمتك ابيك توديني اليوم لسوق صحارى

قلت ليش ياعمه سوق صحارى مافيه ابو ريالين

قالت مهوب شغلك ابروح اشتري شراب العائله <<<< تحسب هذا احدث صرخه

قلت تامرين امر وانا عارف انها تبي تروح تقابلني مادرت اني ولد اخوها اللي اكلمها

يوم وصلتها قالت انزل معي وانا عمتك

استغربت قلت وشلون تبي تقابل واحد وانا معها

قالت انزل يوم نزلت قالت يالله رح للالعاب مهوب انت تبي نتواعد هناك

وقفت وفتحت فمي ست امتار من الاستغراب وشلون عرفت اني انا اللي اكلمها

قلت عمتي وش العابه

قالت انا تراي من جبت هذا النت عندي وانا عارفه انك انت اللي تحاكيني

قلت اجل خلينا نرجع للبيت مانبي فضايح

يوم رجعنا ماعاد لي وجه اروح لغرفة عمتي

على بالي ذهين وصرت دلخ وعمتي اذهن مني اجل لو اصير بعمرها وش يصير لي الله المستعان

واخذ عصا مكنسه واربط فيه فنيلتي البيضاء وانزل من غرفتي رافع راية الاستسلام لعمتي

ويوم دخلت غرفتها لقيتها تسلوف على الخاص مع واحد يوم قربت ودققت لقيته انا من امس ناسي اسوي خروج والقاها ترسل له حب وغرام صارت العمه رايحه وطي حب مع واحد مايكتب شي ومخليها يوم كامل





بعيدا عن صرقوعاتنا ..........



ياجماعه حلاوة البيوت كبار السن احترموهم وقدروهم ولاتقولون لهم لا مهما كان

القصه هذي من نسج الخيال ...

وكبارنا تاج روسنا

لاتحقر أي كبير بالسن وتقول مايفهم التطور والتكنلوجيا تراهم يعرفون اشياء انت ماتعرفها